Pas përfundimit të mbledhjes së Këshillit Politik për Reformën Zgjedhore, bashkëkryetari socialist i komisionit Damian Gjiknuri tha se në takimin e sotëm u paraqit një ekspoze e plotë nga ekspertët lidhur me çështjet juridike.
Gjiknuri u shpreh se puna e Këshillit Politik dhe ekspertëve do të vazhdojnë, ndërsa shtoi se mazhoranca është e gatshme të negociojë me kryedemokratin Lulzim Basha, me qëllim arritjen e dakordësisë.
“Siç jeni në dijeni zhvilluam mbledhjen e radhës për çështjet që kishim në rendin e ditës. Në mbledhjen e radhës do të kalojmë shumë çështje që kemi rënë dakord me opozitën. Së dyti, u bë parashtrimi për ndryshimin e sistemit zgjedhor, dhe ndryshimin e Kushtetutës. Ekspertët bënë rezyme. Gjithashtu, u fol edhe për çështjen e financimeve.
Në mbledhjen e radhës kemi edhe një ndarje të thellë me palët, siç është edhe administrata zgjedhore. Por ramë dakord që shqetësimet të adresohen në Këshill. Ne i referohemi parimit që rekomandimi i ODIHR ka qenë i kahershëm. Brenda këtij parimi, adresojmë edhe shqetësimet e opozitës. Vendimmarrja të jetë jashtë partive, dhe ato të jenë garant.
Nuk dua të them formula… S’ka pse deklaratat e kryeministrit apo dikush të vejë në dyshim këtë Këshill Politik, për të ikur nga tavolina. Palët u riangazhuan për të qëndruar në tryezë. Nisur nga parime të rëndësishme, ne të mundohemi të gjejmë zgjidhje këtu në Këshill. Deklaratat publike, jo “sebepe” për të ikur. Ne jemi formacione politike, patjetër. Unë s’shkruaj romanin tim, jemi parti politike dhe kemi mandat të plot nga lidershipët tanë (kryeministri, lideri i opozitës). Rama e ka thënë për çështje të rëndësishme si integrimi, është gati të ulet me kryetarin e PD, zotin Basha. Vendosëm që ekspertët të vijojnë punë. Mbledhja e radhës në parim është të hënën në orën 10:00.”, u shpreh Gjiknuri.
